कानोकानी

भुमीपुत्रच भूमीहीन झालाय...

भुमीपुत्रच भूमीहीन झालाय,
दाही दिशांना वणवण फिरतोय.
लोकांचे पोट भरणाराच आज मात्र
उपासमारीने मरतोय.

शेतक-याचा पोर उपाशी
शेतक-याच्या देशामध्ये.
कुपोषणाच्या वेषात
बालमृत्यू थैमान घालतोय.
लोकांचे पोट भरणाराच आज मात्र
उपासमारीने मरतोय.

बँकांकडून कर्ज घेतले
दुष्काळाने लादली नादारी.
घाव हा दुहेरी प्रवृत्त
आत्महत्येला करतोय.
लोकांचे पोट भरणाराच आज मात्र
उपासमारीने मरतोय.

सरकारी अनुदाने होत आहेत
मंत्र्यांच्या तिजोरीत बंद.
कर्जवसुलीसाठी शेतक-यांच्या
घरादारावर नांगर फिरतोय.
लोकांचे पोट भरणाराच आज मात्र
उपासमारीने मरतोय.

श्रीमंतांच्या, हिरोन्च्या भल्यासाठी
नवस सायास केले जातात.
गरीब शेतक-याला आपण
पद्धतशीर विसरतोय.
लोकांचे पोट भरणाराच आज मात्र
उपासमारीने मरतोय.